Жорий йилнинг август ойида Тожикистон Республикаси Президентининг мамлакатимизга давлат ташрифи доирасида икки давлат ўртасида Қўшма баёнот ва Стратегик шериклик тўғрисидаги шартнома қабул қилиниши билан бирга турли соҳаларда самарали ҳамкорликни йўлга қўйишга оид муҳим ҳужжатлар имзоланди.

Хусусан, унга биноан жорий йилнинг 27-23 ноябрь кунлари Тожикистон мустақил касаба уюшмалари Федерациясининг кенгайтирилган таркибдаги делегацияси мамлакатимизга ташриф буюрди. Ташриф доирасида Ўзбекистон касаба уюшмалари Федерация ва Тожикистон мустақил касаба уюшмалари Федерацияси ўртасида ҳамкорлик битими имзоланди.

Шу муносабат билан жорий йилнинг 27-28 ноябр кунлари Ўзбекистон Агросаноат мажмуи ходимлари касаба уюшмаси Республика кенгаши делегацияси Тожикистон Агросаноат комплекси ходимлари касаба уюшмаси Марказий қўмитаси ўртасида ўзаро манфаатли ҳамкорлик алоқаларини янада ривожлантириш, тармоқ ходимларининг ижтимоий-иқтисодий ҳуқуқ ва манфаатларини ҳимоялаш, меҳнат муҳофазаси, маданий-оммавий ишлар, соғломлаштириш ва дам олишни ташкил этиш каби масалаларда ўзаро тажриба алмашиш ва ҳалқаро меморандумни имзолаш мақсадида Тожикистон Республикаси Сўғд вилоятига ташриф буюрди.

Ташриф давомида Республика кенгаши делегацияси Сўғд вилоятининг Спитамен тумани раиси-Сулаймонзода Акром Рахимий, Истарафшон тумани раиси- Одил Иззатзода, Жаббор Расулов тумани раиси-Файзулло Қосимий, Бобожон Ғофуров  тумани раиси-Зариф Назирий Вализодалар ўртасида учрашув ўтказилди. Учрашув давомида қишлоқ хўжалигида олиб борилаётган ислоҳотлар, ишлаётган ишчи-ходимлар учун яратилаётган шароитлар билан яқиндан танишдилар.Ундан ташқари делегация аъзолари туманларнинг қадимий обидалари ва диққатга сазовор жойлари билан танишдилар.

Тадбирнинг тантанали имзолаш жараёни Бобожон Ғофуров туманидаги тарихий ва ҳашамдор “Арбоб” анжуманлар саройида ўтказилди. Тадбирни Сўғд вилояти бирлашган касаба уюшмалари ташкилотлари кенгаши раиси Шарифулло Абдулзода очиб бериб, тадбир иштирокчиларига Тожикистон мустақил касаба уюшмалари Федерацияси раиси Қодири Қосимнинг саломларини ва эзгу тилакларини етказди.